夏娃伊意紀遊

阮作伙去社區的圖書館，伊的查某囝嘉宜在圖書館做義工。嘉宜在賓州西爿滯過五、六個月，彼當時伊是國小二、三年生。一九九二年熱天佮伊的爸爸及媽媽搬來夏娃伊意。真唔敢想，伊已經是十年生啦，佫二年就卜上大學。我向勤岸及惠珍恭喜，因為嘉宜是怹十年生全級的第一名。惠珍客氣講：「勤岸及我攏是讀書人，愛看書，寫作；囝仔自然看樣，有興趣讀書。」有影，「身教」勝過「言教」。

嘉宜唯圖書館出來，一位亭亭玉立的水姑娘。坐落車內，我送伊一個小小的物件，拄好算是祝賀伊的小禮物：是阮牽手珠圓款一個皮包，內底囥一寡荔枝風味的果凍。唯圖書館趕轉去勤岸的公寓，捧惠珍煮的料理。勤岸開怹的車，惠珍坐我租來的車，兩台車一前一後開去Waikiki，卜去接林央敏及林宗源。Waikiki車輛濟人佫卡濟，勤岸接著雙林，消失佇車海中。惠珍導航我開車，行上一號公路，向東去。換過濟濟的路，來夠一個山坪的社區，來夠何米豐先生的大間厝。

主人何米豐及伊的夫人攏真好客，出來接阮。人客嘛作伙出來，除去央敏及宗源，原來佫有文友劉大元及蔣為文，佫有尤哈尼牧師，伊在玉山神學院就職，專工來參加這屆的世台會，有伊的專題演講會。時常看著尤哈尼的新聞，是初次參伊見面；伊有排灣族的熱情及進取本性。我有一位排灣族的朋友，參尤哈尼共款在玉山神學院，是卡比教授；卡比1994-95來匹茲堡神學院讀碩士，參我熟悉。尤哈尼在台灣之夜講著心內的感受：來夠世台會，受著尊重；咱著愛將即款各族平等，落實夠全台灣；大家做一流的台灣國民，貢獻世界。尤哈尼，讚！一流的南島語族囝兒。

尤哈尼牧師是正港的南島語族。根據陳順勝教授的DNA分析，百分之九十以上的台灣人攏參有南島語族的血緣。若是用夏娃伊意人的標準，混血夠甚至只有幾拍仙爾爾，猶原算是夏娃伊意人，按呢我勉強也可以算是南島語族人。參尤哈尼講：「台灣既然是南島語族的祖地，有六千年的歷史，夏娃伊意才一千五百外年爾爾，你是元老。」「有影咧，來去出巡。」尤哈尼笑笑仔講。事實上，南島語族開始聯合對話，玉山神學院院長童春發博士帶台灣原住民來參加南島語族的會議，拄好是世台會期間，在茂宜島召開。聯合團結就有力量，世界南島語族若大串聯，必然有出頭天的機運。夏娃伊意人想欲獨立回復怹做主人的地位，大串聯是一個好的起步。夏娃伊意人的獨立時間表必然愛真久長，久嘛愛進行；堅時到底的人才有翻身的機會。親像台灣欲入聯合國，宛然是一款逆水行舟；拼久終有入去的機會，放棄完全無機會。

阮坐落來飲酒話仙。何米豐好客，隨在人客霧薰，三枝大煙筒，薰霧甲爽歪歪。1992年有台灣詩人來美國，拄著真濟厝內不准大範隨意霧薰，唯一的例外是在休士頓簡忠松的府上。傳說簡府的草坪有一角，土中著尼古丁的毒，有二、三年草發未出來。尼古丁毒性唔是噴風的，我做囝仔的時，在莊腳無啥物通好蹉跎，薰屎浸水，用薰水灌肚定蛇，肚定四腳抽咧攏咧，免一分鐘死撓撓。即馬想起來，細漢時，我有做過這款夭壽死囝的代誌。

即擺世台會動員真濟胡亞夫島上的台灣同鄉，親像何米豐不時走機場接人客。眾人話仙的時陣，伊去一綴機場，接亞套蘭大來的藝術家江懿亨先生。江先生在八點外加入扑豆。何米豐府上的聚會可以講是台灣語文營的會前會。因為江先生是來主持語文營的一場台灣電影的講評會。林宗源是台語詩的大詩人，林央敏欲講演台灣文學的反抗精神，胡民祥演講：唯台灣文學史看台語文學的成長，李勤岸主持台語教材的講評會，蔣為文報導越南文唯漢字轉化夠羅馬字的過程。原本欲來的莊芳華老師及建國黨主席鄭邦鎮教授無來。台灣公論報總編輯劉大元新聞神經真利，掠著機會留落來一張〈台語文學寫真〉，登在八月十四號。七身南島語族的囝孫：五位台語文學作家及尤哈尼參何米豐主人，聚集在夏娃伊意地區建國黨負責人何米豐的府上，後埕留影。何米豐當年在台灣的時，是典型的支持台灣建國運動的中小企業家，支持過民進黨。民進黨漸漸失去理想，避脫台灣獨立的提法，何米豐轉過來加入建國黨。在場的林央敏創黨的時是桃園地區建國黨的負責人。

何米豐的後埕有一項特別的植物，有三、四欉，用烏色塑膠布崁咧，伊講是寶貝。眾人猜，猜無，我臆是韭菜，結局唔是。

原來是來自美麗島的，夏娃伊意話叫作 'Ohe，台灣話叫作竹，英文叫伊是 Bamboo。竹仔是夏娃伊意人祖先帶來的，是艋舺航海需用品：竹筒眝水，竹籃仔囥物，古早用竹管仔來起火。波里尼西亞人的女神希娜 (Hina)傳說種一抱唯大溪地帶來的竹仔，地點是茂宜島上。傳說指出：竹是波里尼西族群的造物神 Kane 的形体。

一九九九年九月二十二記