夏娃伊意紀遊

爬樹當然有目的。椰子樹長溜溜，比起爬檨仔樹佫卡難。東南亞的泰國，怹是訓練猴山仔爬椰子樹，挽椰子，南島語族人家己來。表演者雙腳縛一條布，雙手對扣；腳手攬著樹身，腳手併用，布、布、布，那像四腳仔跳平地，輕輕鬆鬆就衝夠樹尾溜。古早武俠小說人物的武功足神通，比起來嘛差一大截，現代都市叢林的爬壁的蜘蛛精，可能有得比評。

東加阿猴唯樹尾撣一粒椰子落來。眾人雙手拍；泡仔聲一直催；東加人的表演者直直拍鼓；鼓聲泡仔聲合齊呵咾東加阿猴的爬樹功夫。

東加男子漢紲落去表演起火。咱真濟人少年時做過童子軍，露營煮飯，起火攏是偷食步，攏是用現代科技，唔是用番仔火，就是用聚光鏡引日頭光。童子軍老師講起鑽木起火，真正按呢起火煮飯的童子軍恐驚無偌濟。東加勇士提一枝那像銼刀的鐵條，銼刀壓在一枝柴，刀口在柴面來回緊急徙動，親像在石磨頂磨刀口的款勢，無一分鐘，火星嚗嚗跳，點著柴枝邊仔的礁草，火著炎炎燃起來。遊客佫再一擺喝咻、呵咾；泡仔聲直直催。

東加阿猴撣落來的椰子，即馬囥在表演台。東加勇士提起來，問眾遊客：

「恁誰有辦法破開這粒椰子？」伊目珠掃過遊客滿滿的看台。

「可以用鐵槌仔摃。」有人建議。

「可以用電動鋸仔來鋸開。」另外有人建議。

佫有人講：「可以用斧頭。」

東加勇士無電動鋸、無鐵槌仔、無斧頭；伊單單有一枝鐵鑽。伊直直徛在表演台，倒手抱著椰子，正手提鐵鑽；彎身將椰子囥在表演台面，正手飛高，目珠及鐵鑽定定相著椰仔，那像老鷹欲掠雞仔囝，俯衝落來，瞬間鐵鑽仔直直插入椰子。

勇士用力一扒，外殼開嘴，椰子仁輦出來。

出力，鐵鑽插入仁，鐵鑽抽出來；椰子汁唯孔嘴流落碗。

伊請三位遊客上台飲椰子汁。我坐在看台邊，是伊邀請起哩之一。每人輪流上台飲椰子汁，然後替每人戴一頂那像林投葉仔編的桂冠，佫插一蕊夏娃伊意州花：扶桑花。我是第三位上台，伊問我佗位來，我應伊：

「來自美洲大陸的賓州西部的茉里鄉。」
「虎膦仙，你那會來自美洲；也唔是啄鼻仔。」伊無相信。
「啊，我原鄉是台灣。」
「按呢嘛卡有影。」

伊捧最後一碗椰子汁互我。頭先兩位，一男一女，攏驚驚，飲起來畏畏縮縮，無夠大範。我爽爽飲落去，伊問我：

「滋味甚款？」
「Delicious!」
「癮(gan)頭！台灣人講台灣話啦！」伊糾正我的英語對話。美洲住久，煞變種，講起啄鼻仔話。
「讚！讚！」我趕緊用台灣話，講出飲椰子汁的滋味。

伊一歡喜，向遊客推銷台灣話：讚！佫問我一寡台灣語詞，包括Coconut是椰子，Cooking是煮飯。然後，伊問我：

「結婚未？」
「有某有囝，當然結婚啦！」
「你日子敢有快樂？Are your happy?」
「足快樂！Very happy」
「啊你的牽手咧，奈無看著？」
「無來；我家己來。」
伊無啥相信的款。

將一頂桂冠戴落我的頭殼，扶桑花插在我的正邊耳仔。伊講，恁某無來，算獨身仔，根據夏娃伊意傳統，單身的，花插正耳，結婚的倒耳；親像遊大島火山公園時，巴士司機所講的共款。

有飲、有桂冠戴、有花插正耳，東加勇士請我合照留念。我將桂冠戴咧，一路參觀文化；戴去食暗頓，戴去看暗會，戴轉去夠旅社；嘛帶轉來茉里鄉。

彼暝食過夏娃伊意晚餐，欲入去參觀歌舞表演進前，找著我參東加勇士的合照，付錢，提一張作紀念。

歡喜去東加人表演場，這個經驗算是文化中心遊覽的高潮時刻。

寫佇茉里鄉(2000-9-17)