／ 劉大元

千魚泅水來去千年
不過是日頭浮水面

千杯乾盡鬱卒艱苦
不過是早起醒頭疼

千雲叛天形影拖地
不過是雨落的運命

千詩想伊悔不當初
不過是詩死時是詩

千鬼討命怨債紛紛
不過是孽緣起又落

千野守江守湖守海
不過是土地失腳印

千手空挺虛迷攏空
不過是冷冰的姿勢

千面化身假怪溜漩
不過是打破鏡中影

千千萬萬呀萬萬千
不過是數字呀簡單

何必多言？
世間事
憨人氣賁賁
巧人假憨憨
因為簡單
所以亂

/ Lau Taigoan

chhian hi siu chui lai khi chian ni
put ko si jit-thau phu chui bin

chhian poe kan chin ut-chut kang-kho
put ko si cha khi thau-khak thiaN

chhian hun phoan thiN heng-iaN thoa te
put ko si ho lok e un-mia

chhian si siong i hue put tong chho
put ko si si si si si si

chian kui tho mia oan che hun hun
put ko si giat ian jhi iu lok

chhian ia siu kang siu o siu hai
put ko si tho-te sit kha-in

chian chhiu khang theng hi bi long khang
put ko si peng leng e chu-se

chhian bin hoa sin ke koai liu soan
put ko si pha phoa kiaN tiong iaN

chhian chhian ban ban ah ban ban chhian
put ko si so-ji ah kan-tan

ho pit to gian?
se kan su
gong lang khi phut phut
khiau lang ke gong gong
in-ui kan-tan
so-i loan